Terwyl ek nou aan’t gesels is oor grafte wat stories vertel, besef ek die graf van my oupa Jakob Hendrik Van Deventer het ook sy eie storie. Kyk mooi na sy geboortedatum. Hy is in 1871 gebore.Sy seun, my pa, Johannes Cornelius, volg ‘n ronde 40 jaar later in 1911. Hierdie Jakob Hendrik volg toe op sy beurt ‘n ronde 30 jaar later in 1941. My seun, Johannes Cornelius, saam op die foto, volg daarna ook ‘n ronde 30 jaar later in 1971.
Iemand reken dis omdat die Van Deventers se rekenkunde verdag is dat hule liewer net met ronde syfers werk.
Die dubbelgraf van oupa en ouma Van Deventer is verlate op die familieplaas Rondspring in die distrik Babanango in KwaZulu-Natal. Al die plase daar is lankal onteien en deesdae uiters ontoeganklik. Jurie Mentz wat LV was vir Vryheid het ons in die 80’s daarheen geneem met sy 4 x 4, en dit was nogal ‘n uitdagende rit.
