Ten minste het die uiteindelike lot van die koerant waarvoor hy en ander sulke groot drome gekoester en opofferings gebring het, die vegterprins Schalk Pienaar gespaar gebly skryf ek vandag in my laaste brief in Beeld. So lui die volledige brief: By die afskeid van Beeld soos ons hom ken verdien sy stigtersredakteur, Schalk Pienaar, ‘n spesiale woord.
Hierdie “vegter-prins” van die Afrikaanse joernalistiek – die treffende beskrywing deur tydgenoot Piet Cillié – is twee keer met die hand uitgekies om vir die Nasionale Pers met koerantstigtings in die noorde ‘n droom te gaan verwesenlik. Albei keer het die droom aan skerwe gespat,
Die Sondagkoerant Die Beeld het in 1965 tot stand gekom en die dagblad Beeld (sonder die Die) 11 jaar later, in 1974. Eersgenoemde is aan die vooraand van glorie onder geweldige politieke druk in 1970 in ’n geriefshuwelik met sy mededinger, Dagbreek en Landstem, gedwing en het in Rapport opgegaan het. Vir Pienaar was die “samesmyting” (sy woorde) verpletterend. Hy het die Bybelse uitroep gebruik: “Dit voel of die vel van my lyf geskeur word.”
Sy argwaan was teenoor Lang David de Villiers, besturende direkteur, en die Nasionale Pers se direksie. Sy emosie en betoë moes geen geringe rol gespeel het om by De Villiers ’n vuurtjie vir herlewing van die ideaal aan te steek nie: ’n eie dagblad in die ekonomiese hartland.
Ondanks toenemende gesondheidskwellings is weer by die dinamiese Pienaar aangeklop om die vaandel te dra. Ondanks sy vorige teleurstelling het hy ‘n tweede keer hoopvol die skuif noorde toe gemaak. Maar hy was die skaduwee van die man wat hy ‘n dekade tevore was. Ná net vier maande moes hy, uitgemergel deur kanker, tou opgooi.
Die vreugde van oorwinning na ‘n intense vestigingstryd van ses jaar was hom nie beskore nie. Hy is in 1978 oorlede. Die uiteindelike lot van die koerant waarvoor hy en ander sulke groot drome gekoester en opofferings gebring het – dit in sy jubileumjaar – het hom genadiglik ook gespaar gebly
‘n Tweede keer sou hy in bitterheid kon uitroep: “Dit voel of die vel van my lyf geskeur word. “
