Apr 24, 2013 | Hennie van Deventer se Blog
BO: BERG EN WINGERD BY JASON’S HILL
ONDER: NUWE LEWE VIR ‘N HOENDERHOK
More uit Melkbos
Soos die jare aanstap, verander baie goed van waarde in hoenderhokke: allerlei ou geboutjies, voertuie en ander eiendom wat hul nut verloor het. Min ou hoenderhokke kry ‘n nuwe lewe.
Een wat het. is ‘n oulike eetplek en winkeltjie by Grietjiesdrif in die hartjie van die Slanghoekvallei, net 10 km van Rawsonvallei en feitlik teenaan die Goudini Spa. (Die gastehuis daar was voorheen ‘n wynkelder.)
’n Versnapering onder Grietjiesdrif se akkerbome terwyl jy die landelike berglandskap indrink, laat jou voel die ou wêreld is tog ‘n goeie plek. Hou net dop vir die hoenders. Hulle herbesoek graag hul ou woonplek!
Jy kan ook deftiger eet in die Slanghoekvallei. Opstal lyk eersteklas, maar was ongelukkig toe op ‘n Maandag. Jason’s Hill kyk uit op lappe wingerd wat in die verte teen die berge doodloop – poskaartmooi. Boshimela (wat beteken groen plek met groot bome) op die plaas Die Eike spog met allerlei plaasdiere en ‘n piekniekplek.
Honger, dors of verveling dreig nie in die Slanghoekvallei nie. (hvd)
Apr 23, 2013 | Hennie van Deventer se Blog
More uit Melkbos
Die rustigheid oorval jou op Dwarsberg. Voordat jy jou kan kom kry, het jy ‘n wyntjie oop en ‘n vuurtjie aan die flikker onder die reuse-akkers.
Iemand van die omgewing het die prentjiemooi forelplaas by ons aanbeveel vir slaapplek naby Rawsonville. Dit sal vir sommige dalk ‘n bietjie eenkant wees. Maar vir die entjie ekstra ry (op goeie grondpad) kry jy ‘n karaktervolle huisie met ‘n groot vuurherd, ‘n eie poeletjie met eende en hope voëlnessies aan die wilgers se takke, asook pragtige uitsigte op die omringende berge. Lappe wingerd reik tot amper teenaan jou huis.
Die sewe kampeerplekke langs die riviertjie lyk vir hierdie nie-kampeerder hemels.
As jy miere het, kan jy gaan stap hoog bo die kronkelende rivier wat in die vallei ‘n reeks kristalhelder swempoele vorm, of in die wingerde gaan ry. Jy kan natuurlik jou hand wag aan forelhengel, As jy baie aktief is, kan jy ‘n tog te voet of met ‘n bergfiets aandurf.
Ek het verkies om ‘n tweede bottel Slanghoek Special Reserve oop te maak en my vuur op te pas… Die prys is verrassend – van die Slanghoek Reserve en vir Dwarsberg. (hvd)
Apr 21, 2013 | Hennie van Deventer se Blog
More uit Melkbos
Net voordat ons ry Slanghoevallei toe vra my vriend Koos Myburgh: “Ry julle oor Bainskloof?” Daar en dan besluit ek: dan maak ons so.
Dit was vyfster. Beveel die roete sterk aan vir ‘n daguitstappie of langer. Via die skilderagtige Bainskloofpas (by Wellington) benader jy dan die Slanghoekvallei van Bergsig-kelder se kant. Jy ry verby Opstal, Breëland, Slanghoek, Jason’s Hill en Badsberg na Rawsonville. Dan huis toe via DuToitskloof.
As jy wil oorslaap (Goudini-Spa en die Slangoek-bergoord is maar twee moontlikhede) kan jy ook die Louwshoek-driehoek ry (Goudini, Merwida, Avondrood, Dashbosch en Kirabo), en/of die Breederivier-roete (Olofsberg, Botha – sy Dassies is nog altyd goeie waarde! – Waboomsrivier, Bergsig, Lateganskop, Mountain Ridge.)
Op die R101 is die kelders Lorraine, Du Toitskloof, Du Preez en Groot Eiland.
Waarlik kelders te kus en te keur. Maar die mooiste is die sielstrelende landskappe: reuse-berge en uitgestrekte wingerde tot teen die pad. En die berg, berge druiwe op pad kelders toe. Moenie uitstel nie.
Slanghoekvallei is dalk die Kaap se blinkste onontdekte juweel, terwyl die verkeer voet in die hoek op die naasliggende N1 verbysnel.
