Van hierdie 1957-matriekklas van Volkies, Potchefstroom,  sal ná 3 Januarie 2021 nie een oor wees wat nog onder 80 is nie.  Die baba van die klas, wat die uwe is, bereik dan daardie baken.  Hoeveel van die klas nog lewe, is ‘n vraag. Dalk minder as die helfte.

So mymer ek en klasmaat Willie Hartzenberg, ons dux-leerling wat die langsdienende regter in die Noord-Gautengse Hooggeregshof geword het – ‘n legende op die regbank met sy kennis, humor en jovialiteit – gister toe ek hom bel om op sy 81ste geluk te wens.  Wonder of Willie daaraan gedink het dat hy op 81 presies so oud is soos ons klas groot was.

Ek kon hom nie herinner nie, want ek het dit eers ná die oproep die sommetjie gemaak.  Verskeie ander klasmaats was, soos Willie,  1939-kalwers en het al vroeër die 81-kerf oorgesteek.

Onder die jongste 1940-kalwers was Leon Engela, ‘n ginekoloog, Anton Lombaard, mediese dokter, en Giel de Swardt, prokureur, met wie ek nog kontak het. Dan was daar Hermannie Murray (Smit) net-net ouer as ek. Wonder of sy nog in Pretoria woon. Poenkie de Villiers, ook een van die babas van die klas, is reeds oorlede.

Ander wetenswaardighede:  Twee van die 81 het regters geword, Willie en Ferdinand Preller, en drie doktore, Susan Conradie, Gert Sauer, albei sielkundiges, en Van Aardt du Preez, aardrykskundige wat ‘n verfdeskundige geword het. Twee mediese spesialiste  is opgelewer, Leon en wyle Mornay du Plessis, ortopeed.  Twee skrywers van wie ek weet, is wyle Christine (Marais) Steyn en ekself.

Twee maats was later die besitters van private vliegtuie, Anton toe hy op Calvinia dokter was, en Dok Malan.  Verder het  verskeie prokureurs, ingenieurs, dokters, dosente en ‘n dagblad-redakteur uit die geledere gekom. Een , Charles Bamberger, was Wes-Transvaal se krieketkaptein.

Twee destydse paartjies, Koos van Niekerk (hoofseun) en Ina van der Westhuizen. asook Piet Otto en Hettie du Toit, het met mekaar getrou. Piet en Hettie is in 1979 geskei en 18 jaar later, in 1997, weer getroud. Koos,Ina en Piet is al oorlede. Hoofmeisie, Wena de Kock (Louw), se Pieter is al heen. Sy is egter fiks, gesond en bedrywig.

Ina het in ‘n motorongeluk omgekom, soos MOrnay du Plessis en Tokkie den Dulk. My kamerrmaat, Wiekie Moolman, het as jong man ‘n ernstige motorongeluk oorleef. Hy is vanjaar aan natuurlike oorsake oorlede. ‘n Ander goeie vriend, Carel Weeber, het al geruime tyd gelede  vooruit gegaan.

Een klasmaat,  Dirkie Jacobs,  was jare der jare gelefde  in sy huis die slagoffer van gewapende rowers en ‘n ander, Louwrens Snyman, is voor ‘n nagklub in Johannesburg vermoor.

In ons Latynklas was vyf seuns. Al vyf lewe nog en is/was altyd gereeld voltallig teenwoordig  by reünies.  Hulle is ekself, Willem Hartzenberg , Ferdinand Preller,  Koot Bosman (dosent aan Tukkies) en Giel de Swardt (prokureur op Jeffreysbaai).

Alles in ag genome nie ‘n te slegte oesjaar nie.

Deel dit: